BUTUAN CITY – Gibag-o na sa United Nations Commission on Narcotic Drugs ang klasipikasyon sa marijuana gikan sa dangerous drugs ngadto na sa less dangerous drugs.
Gihimo ang botohay sa 53 ka mga membrong nasud, human nila gi-review ang rekomendasyon sa World Health Organization nga tangtangon na ang marijuana gikan sa gitawag nga Schedule IV sa 1961 Single Convention on Narcotic Drugs diin kini gi-classify isip dangerous drugs ka-uban sa maka-adik nga mga druga sama sa heroin, 3-methylfentanyl, desomorphone ug uban pa.
Nalakip sa Schedule IV ang mga substances nga gikonsiderang grabeng maka-adik ug makonsiderang highly liable for abuse ug kinahanglang butangan og label isip makadaut ug limitado kaayo ang medical og therapeutic value niini.
Apan magpabilin gihapon ang marijuana isip subject sa tanang level sa kontrol ilalom sa Schedule 1 apil na ang mga requirements alang sa prescription niini.
Sa pagkakaron, kapin na sa 50 ka mga nasud ang nag-adaptar na sa Medicinal Marijuana Program samtang 15 ka mga estado sa Amerika ang gihimo nang legal ang marijuana alang sa recreational use.
