BUTUAN CITY – Muabot na sa 824,913 ka mga miyembro ug dependents sa tibuok rehiyon sa Caraga ang nakapahimulos sa mga serbisyo sa panglawas ubos sa Philippine Health Insurance Corporation kon PhilHealth Caraga pinaagi sa YAKAP kon “Yaman ng Kalusugan Program” hangtod niadtong Abril 30, 2026.
Sigon ni Jocelyn E. Cañete, hepe sa Field Operations Division sa PhilHealth Caraga nga ang Surigao del Sur ang adunay pinakataas nga gidaghanon sa mga benepisyaryo nga nakapahimulos sa serbisyo nga miabot sa 387,829, gisundan sa Agusan del Sur nga adunay 297,397; Agusan del Norte nga adunay 124,581; Surigao del Norte nga adunay 123,875; Butuan City nga adunay 44,515; ug Dinagat Islands nga adunay 19,532.
Gibutyag usab ni Cañete nga nakarehistro na ang PhilHealth Caraga og 885,282 ka miyembro ug dependents ubos sa YAKAP program sa tibuok rehiyon.
Sa mga narehistro, ang Surigao del Sur gihapon ang adunay pinakataas nga ihap nga 315,718, gisundan sa Agusan del Sur nga adunay 250,290; Surigao del Norte nga adunay 130,424; Butuan City nga adunay 52,828; Dinagat Islands nga adunay 22,665; ug Agusan del Norte nga adunay 13,357.
Samtang gi-accredit sa buhatan ang 134 ka YAKAP clinics sa rehiyon isip suporta sa tinguha sa nasyonal nga gobyerno nga maabot ang serbisyo sa panglawas bisan sa mga hilit nga lugar.
Lakip niini ang 38 ka clinics sa Surigao del Norte, 32 sa Surigao del Sur, 24 sa Agusan del Sur, 20 sa Agusan del Norte, 13 sa Butuan City, ug pito sa Dinagat Islands.
Adunay 58 ka fully validated GAMOT o “Guaranteed and Accessible Medications for Outpatient Treatment” providers usab sa Caraga, subay sa prayoridad sa administrasyon nga masiguro ang baratohon ug sayon nga akses sa essential medicines ug outpatient healthcare services alang sa mga Pilipino.
Lakip sa validated GAMOT providers ang 15 sa Agusan del Sur; 12 matag usa sa Surigao del Norte ug Surigao del Sur; siyam sa Butuan City; ug lima matag usa sa Agusan del Norte ug Dinagat Islands.
