BUTUAN CITY – Gihatagan matud pa og clearance sa House of Representatives si Leyte 1st District Rep. Martin Romualdez para mobiyahe sa Singapore, sumala sa iyang abogado.
Kini sukwahi usab sa unang pamahayag sa Office of the Ombudsman nga wala niini gipaboran ang travel request ni Romualdez.
Gipasabot ni Ombudsman Jesus Crispin Remulla nga si Romualdez anaa ilalom sa Immigration Lookout Bulletin Order samtang nagpadayon ang imbestigasyon mahitungod sa matud pa flood control scandal rasong wala nila girekomenda ang iyang pagbiya sa nasud ug gipamugos nga mas maayong sa Pilipinas na lang siya magpatambal.
Apan giklaro sa abogado ni Romualdez nga si Atty. Ade Fajardo nga dili kini travel ban, kundi simpleng koordinasyon lang sa immigration, ug gipamugos nga nahatagan na og travel authority ang magbabalaod.
Sa usa ka video, Gibutyag usab ni Romualdez nga mobiyahe siya sa Singapore gikan sa Abril 20 hangtud Mayo 4 para sa follow-up checkup human ang angioplasty ug gipaneguro niyang mobalik siya sa nasud og magpabiling available para sa mga katungdanan sa Kongreso.
Samtang mihangyu usab ang Office of the Ombudsman og precautionary hold departure order batuk kaniya may kalabutan sa imbestigasyon sa 56-bilyones pesos nga flood control kickback scheme diin gitumbok siya isip dunay taas nga posibilidad nga mosibat ug posibleng nalambigit base sa mga testimonya ug affidavit sa pipila ka personalidad sama ni kanhe Cong. Elizaldy Co ug mga testigong miatubang sa mga pagdungog sa Senate Blue Ribbon Committee.
