BUTUAN CITY – Nagpasalamat si Kent Ryan Tomao, lumad nga taga-Kidapawan, North Cotabato ug kasamtangang nagpuyo sa Bunawan, Agusan del Sur ngadto sa Philsaga Mining Hospital nga maoy nag-x ray kaniya hinungdan nga nadiskubre ang kutsilyong anaa pa sulod sa iyang lawas.
Sa eksklusibong pakighinabi sa Bombo Radyo Butuan, gipadayag sa 25-anyos nga ulitawong si Tomao nga nangaplay siya og trabaho sa maong minahan ug apil sa gi-require kaniyang isubmite ang medical certificate ug x-ray result hinungdan nga nagpasusi siya sa maong ospital diin didto nakita ang kutsilyong anaa pa sa iyang lawas.
Gibalibaran matud pa siya sa maong kompanya tungod sa nasangpit nga sitwasyon apan gisaarang pasudlon higayong makuha na ang maong kutsilyo.
Mitambag na matud pa ang doktor nga misusi kaniya nga kinahanglang makuha ang maong kutsilyo tungod kay nagkaduol sa kini sa iyang baga kansa naghatag og delikado sa iyang kinabuhi.
Gisaysay pa niini nga usa ka tuig ug duha ka buwan na ang nakalabay dihang nadunggaban siya sa ilang lugar sa Kidapawan.
Gidala matud pa siya sa ospital diin gihinluan lang ang iyang samad ug gitahi diretso nga wala na mi-agi og x-ray rason nga wala nabantayang anaa pa diay sa sulod sa iyang lawas ang kutsilyo.
Wala matud pa siya’y laing gibati sa iyang lawas sulod sa maong gidugayon gawas lang nga dali ra siyang hangakon ukg tugnawon sukwahi niadtong wala pa siya nadunggaban.
Nakig-alayon na usab matud pa ang mga doktor sa Philsaga Mining Hospital ngadto sa mga surgeons aron ma-refer ang iyang sitwasyon.
