BUTUAN CITY – Padayong suspendido ang face-to-face classes karung adlawa, Lunes, sa tanang lebel sa tanang public ug private schools sa Butuan City og Cabadbaran City, lalawigan sa Agusan del Norte.
Kini base na usab sa nagkada-iyang kamanduan sa matag-lokal nga kagamhanan tungod gihapon sa kainit sa panahon diin gilaumang mosaka hangtod sa 43 degree celsius ang heat index karung adlawa nga peligroso na sa tawo.
Samtang dunay ubang mga local government units nga gibalik na ang face to face classes sama sa lungsod sa Nasipt, Agusan Del Norte human gimando ni Mayor Roscoe Plaza ang pagtangtang na sa suspension.
Samtang sa lungsod sa Buenavista, sa susamang lalawigan, balik na usab ang face-to-face classes karong adlawa apan hangtud lang sa alas 11:00 sa buntag og sa hapon bitbiton na lang nila ang ilang modules.
Tungod niini gi-aghat ang mga eskwelahan nga mugamit og laing pamaagi sa pagkat-on sama sa asynchronous o synchronous learning method.
Gipahinumduman usab ang tanan sa pag-inom kanunay og tubig, likayan ang dugay nga pagbulad sa init ilabina sa mga peak hours, magsul-ob og gaan ug luag nga sanina, likayan ang sobra nga pisikal nga kalihokan sa panahon nga pinaka-init ang silaw sa adlaw.
Kung makasinati og pagkalipong, labad sa ulo, pagluya o uban pang sintomas tungod sa kainit, kinahanglang mopahulay dayon sa bugnaw nga lugar ug mangayo og tabang kung gikinahanglan.
