BUTUAN CITY – Ang kakulang sa 1-2-3 punch maoy nagpapildi kang Pinoy boxing champion Mark ‘Magnifico’ Magsayo gikan sa naluya na untang si Mexican-American boxer Rey Vargas sa ilang away sa Alamodome, Texas.
Sa eksklusibong pakighinabi sa Bombo Radyo Butuan, gipadayag ni Bombo international correspondent Pinoy Legarda-Gonzales nga bisan og na-behind si Magsayo og pila ka round human nga sa unang duha ka round lang kini nakalabaw, apan hayag na unta ang iyang kada-ugan dihang iyang napatumba sa round 9 ang Mexican-American boxer.
Ang wala matud pa pag-pressure og sunod-sunod nga pag-atake ni Magsayo kang Vargas dihang naluya na kini, maoy naghatag og higayon sa challenger nga mas maka-iskor og dugang.
Ang resulta sa away nakapadismaya matud pa sa mga Pinoy ug mga Amerikano sa maong nasud apan nakapahugyaw sa mga Meksikano.
