Katawhan sa Guam nga maagi-an sa super typhoon Mawar, gihikling na

BUTUAN CITY – Nabati na sa katawhan sa Guam ang epekto ni Super Typhoon Mawar.

Sa eksklusibong pakighinabi sa Bombo Radyo Butuan, gibutyag ni Bombo International Correspondent Ricky Abatayo direkta sa Guam, nga nasinatian na nila karun ang kusog nga hangin inubanan sa pagpangilat.

Hinoon anaa sila sa luwas na nga kahimtang tungod kay gihikling naman silang daan sa ilang kompanya rasong wala na silay trabaho sukad pa sa nakalabay nga adlaw ug maghulat na lang sila sa update kung kanus-a sila pabalikon sa trabaho.

Sa karun dili na sila kagawas tungod sa kusog nga hangin samtang giputol na usab ang linya sa kuryente rasong hilabihan kangit-ngit sa ilang dapit ilabina sa kagabhion.