BUTUAN CITY – Gikumpirma ni San Vicente National High School assistant principal Rosanilla ‘Lai’ Consad nga gi-dismiss na sa Tubay-Santiago Municipal Trial Court ang kasong multiple attempted homicide nga gipasaka sa kapulisan batuk kaniya.
Kini human siya gidakop niadtong Marso 21 ning tuiga tungod sa pagkutay kaniya nga mao matud pa’y mipusil-patay sa usa ka pulis ning rehiyon taliwa sa kamatu-urang anaa lamang siya sa iyang puy-anan dihang nahitabo ang insidenteng gipasangil kaniya.
Sa eksklusibong pakighinabi sa Bombo Radyo Butuan, gipadayag ni titser ‘Lai’ nga ang kawala’y lig-ong ebidensya ang nagtukmod sa korte aron ibasura ang maong kaso.
Alang kang titser Lai, gikonsidera niya kining dakong kada-ugan alang kaniya ilabina sa iyang pamilya nga maoy mas nahasol sa kreming gipasangil matud pa kaniya ingon man sa ACT Teachers’ partylist diin siya opisyal ning rehiyon.
Sa desisyong iyang nadawat, dako ang iyang pagpasalamat tungod kay alang sa ordinaryong tawong sama kaniya ug nanarbaho lang sa gobyerno nga gipasanginlan sa dakong kremin, dako na kining kada-ugan.
Bisan pa man sa mga nahitabo kaniya, dinhi niya nakita ang mga tawong mituo sa iyang pagkatawo nga maoy iyang gipasalamatan ilabina kadtong mga nagdasig kaniya.
Misaad siya nga bisan pa man sa iyang kasinatian, padayon ang pagserbisyo niya sa kabataan aron mahatagan og saktong edukasyon.
