BUTUAN CITY – Miabot sa kapin 9-mil ka drayber og operator sa tricycle sa 6 ka siyudad sa rehiyon sa Caraga ang mahatagan og fuel subsidy nga 5-mil pesos karung adlawa.
Sigon ni Jean Paul Parajes, Assistant Regional Director sa Department of Social Welfare and Development kon DSWD-Caraga nga simultaneous ang paghatag sa fuel subsidy diin dinhe sa siyudad sa Butuan muabot sa kapin 1800 ang benipisyaryo diin ang payout gihimo kini sa Covered Court sa Barangay Doongan.
Pagklaro pa sa opisyal nga paningkamotan nilang makadawat ang tanang benipisyaryo karung adlawa apan kung duna gyuy kakulian, mohimo gihapon sila og special payout apan wala pay petsa niini.
Gibutyag pa niini nga ang listahan sa mga benipisyaryo ila kang gikuha gikan sa lokal nga kagamhanan og maoy ilang giproseso hangtud nga nahatagan og alokasyon.
Gipaneguro usab sa opisyal nga simply lang ang rekisitos nga ilang gipangayu base usab sa kamanduan ni DSWD Secretary Rex Gatchalian.
Sa kabahinan ni DSWD-Caraga Regional Director Mari-flor Dollaga nga sinugdanan palang kini sa paghatag og fuel subsidy tungod kay musunod unya niini sa mga munisipyo nga hinaot mahitabo lang sunod semana.
Subaybayan nalang matud pa ang posting sa ilang social media account tungod kay didto ipahibalo ang mga cash relief assistance sa mga drayber.
