BUTUAN CITY- Mingbahad si US President Donald Trump nga atakehon ang Oman, usa sa inilang kaalyado sa Amerika, ugaling dili kini magtarong o mag-“behave”.
Gihimo sa presidente sa US ang maong hulga subay sa mga taho kalabot sa daw negosasyon tali sa Iran ug Oman.
Sumala sa mga taho, nagplano ang duha ka nasud nga ubang magpahamtang og toll sa mga barkong mo-agi sa Strait of Hormuz. Ang nasangpit nga Strait usa sa kritikal nga ruta alang sa mga oil tanker sa tibuok kalibotan kansa temporaryong gisira sukad mingbusikad ang kagubot sa US ug Israel batok sa Iran.
Una nang gideklara ni Trump niadtong Martes nga magbukas na usab ang agi-anan sa tanan ug walay ni kinsang nasud ang adunay katungod nga magkontrol niini. Matud pa, bantayan sa Amerika ang lugar isip parte na usab sa ilang kasamtangang pakignegosasyon.
Sa pagkakaron, wala pay gipagawas nga katin-awan ang White House kalabot sa kontrobersyal nga pamahayag ni Trump, ug wala pa usab minghatag og opisyal nga tubag ang Embahada sa Oman sa Washington kalabot sa hisgutanan.
