BUTUAN CITY – Nakakita og probable cause ang Office of the Ombudsman aron pasakaan og tulo ka ihap sa kasong perjury si kanhi Dinagat Islands mayor Gwendolyn Ecleo subay sa nakalatid ilalom sa Article 183 sa Revised Penal Code.
Ang mga kaso batuk kang Ecleo mitumaw human nakakita ang Ombudsman og pipila ka mga misrepresentations sa iyang Statement of Assets, Liabilities and Net Worth kon SALN alang sa mga tuig 2006, 2007 og 2010.
Migawas sa official records gikan sa Land Transportation Office kon LTO nga naka-purchase og nakaparehistro si Ecleo og lima ka mga motorsiklo niadtong tuig 2006 apan wala’y bisan usa niini nga mga assets ang gideklara sa iyang mga SALNs.
Gibutyag ni Ombudsman Conchita Carpio Morales sa maong resolusyon nga wala’y duha-duhang namakak ang respondent dihang iyang gitangtang sa iyang 2006, 2007 og 2010 SALNs uban sa tinguhang kini nga mga statements kinahanglang dawaton taliwa sa mga sayop nga nakalatid niini. (Beth Ruiz)
