BUTUAN CITY – Sagol kakurat ug kalipay ang gibati sa mga rescuers sa nahugno nga siyam ka andana nga building sa Barangay Balibago, Angeles City, Pampanga human nga mipatim-aw ang usa ka lalaking una nang gikatahong missing dihang gi-assess na nga wala na’y senyales nga duna pa’y buhi sa mga nadat-ugan sa maong dakbalay.
Kini human nga ang maong gika-ingong na-missing nga si Andy Lemorinas, personal nga niadto sa City Social Welfare and Development Office aron ipahibalo nga wala siya ma-apil sa insidente.
Sa pagkakaron, gi-shift na ang operasyon gikan sa search-and-rescue ngadto sa retrieval kondiin upat ang kumpirmadong patay samtang 16 ang gi-report nga trapped o missing.
Nanawagan karon si Mayor Carmelo Lazatin II sa building owner ug sa contractor nga makig-coordinate sa mga otoridad tungod kay wala pa’y klaro nga listahan sa mga trabahante nga anaa sa sulod sa building atol sa insidente.
Nasayrang ang kakulang sa koordinasyon ug transparency naghatag og kalisod sa mga responders pag-ila sa mga biktima ug sa paghatag og hustong tabang.
