BUTUAN CITY – Mihangyu og apela ang kampo ni Kanhe Pangulong Rodrigo Duterte batuk sa desisyon sa International Criminal Court (ICC) nga kumpirmahon ang mga kasong gisang-at batuk kaniya.
Sa gisubmiteng 18 ka palid nga dokumento sa ICC Pre-Trial Chamber I, gipamugos sa depensa nga nasayup matud pa ang huwis sa pagtugot nga moabante ang kaso, ug gitawag kining “impermissibly flexible” sa pagmugna og mga pasangil.
Sumala sa kampo ni Duterte, dili matud pa klaro ang ebidensiyang nahimong basehan sa korte sa pag-apruba sa mga kaso, nga matud pa mamahimong makaapekto sa pagka-patas ug maayo nga dagan sa pagtaral.
Nag-atubang si Duterte sa tulo ka ihap sa crimes against humanity mahitungod sa mga pagpatay sa ilalom sa iyang war on drugs, ug kasamtangang napriso sa The Hague sukad pa niadtong Marso 2025.
Samtang namugna na usab ang Trial Chamber III sa ICC nga nagkupot sa kaso, nga magsilbing musunod nga yugto sa pagdungog batuk sa kanhe pangulo.
