BUTUAN CITY – Gidayeg ni Agusan del Norte Jail Warden Fermin Antenorio, kanhing News Writer ning sibyahan, ang Bombo Radyo Butuan alang sa nasakmit niini nga mga pag-ila sa Butuan City Government, ilabi na isip Radio of the Year atol sa gipahigayong Media Summit nga gipangunahan sa Public Information Division kagahapong adlawa.
Sumala sa nasangpit nga opisyal nga hangtud karon, nagpabilin gihapon ang kadasig sa Bombo Radyo nga makahatud og saktung balita sa mga katawhang Butuanon ug Caraganons. Sumala niini nga wala gihapon nawala ang kultura sa sibyahan sa paghatud sa tinood ug dili himo-himo lamang nga balita. Sumala niini nga dako ang iyahang kalipay tungod kay hangtud karon, nagpabilin gihapong daw usa lang gihapon siya sa Bombo Radyo Butuan.
Ang pagtimbaya ni Agusan del Norte Jail Warden Fermin Antenorio sa kalampusang nasakmit ning sibyahan.
Kahinumduman nga hakot-award ang Bombo Radyo Butuan sa pinakaunang Media Summit kagahapong adlawa, nga gipangunahan sa Butuan City Public Information Division, diin gilaumang kini lang ang pinaka-una sa tinuig na unya nga Media Summit ning dakbayan. Nasakmit ning sibyahan ang tulo ka mga pag-ila, sama nalang sa ‘Radio of the Year’ award, ingon man sa ‘Best Radio Commentator’ ug ‘Best News Anchor’ kansa giharos ni Bombo Radyo Butuan acting Assistant Station Manager Rey Brangan.
Gawas niini, gihatagan usab ang sibyahan og plaque of appreciation tungod sa ilang malipayong pag-ila sa wala’y hunong nga suporta ug kontribusyon sa Bombo Radyo Butuan aron ipahibalo ngadto sa publiko ang mga programa ug inisyatiba sa lokal nga panggamhanan alang sa katawhang Butuanon.
