BUTUAN CITY – Gikumpirma sa Office of the Prosecutor (OTP) sa International Criminal Court (ICC) ang pagpagawas og arrest warrant batuk kang Senador Ronald “Bato” dela Rosa, nga opisyal nang gikonsidera isip suspek sa nagpadayon nag crimes against humanity case sa ICC.
Sa usa ka pamahayag, gibutyag sa OTP nga usa ka mahinungdanong lakang ang nasangpit nga warrant batuk kang Dela Rosa sa nagpadayon nga paggukod sa pagpanubag sa matud pa mga nahimong krimen sa ilalom sa war on drugs campaign sa Pilipinas.
Sumala sa OTP, ipadayon sa buhatan ang makuting pakig-alayon sa Registry ug sa tanang kooperasyon sa stakeholders para mapadali ang pagsilbi sa warrant.
Sigon pa sa Prosecutor, ang sekretong arrest warrant giisyu niadtong Nobiyembre 6, 2025, tulo ka adlaw human giduso ang nasangpit nga request. Gipahibalo kini sa mga hingtungdang otoridad sa Pilipinas human kini gi-isyu.
Una niini, niadtong Lunes, gimandu sa ICC Pre-Trial Chamber I ang pag-reklasipika sa warrant para himoon kining gikan sa pagka confidential.
Mahinumdumang si Dela Rosa una nang gitumbok isip usa sa co-perpetrator ni kanhe Pangulong Rodrigo Duterte sa matud pa crimes against humanity.
Sumala sa OTP, base sa ilang giprisentang ebidensiya, nakitaan sa Trial Chamber nga dunay reasonable grounds o igong basehan aron toohang si Dela Rosa, isip kanhe Davao City Police Director ug nahimong PNP Chief, responsable sa crimes against humanity tungod sa mga pagpatay taliwa sa drug war sa Duterte administration.
