BUTUAN CITY – Naaresto ang usa ka confidential agent matud pa sa National Bureau of Investigation kon NBI atol sa kagubot sulod sa Senate building kagabii.
Sigon ni Senadora Imee Marcos, nadakpan ang maong indibidwal human niini gibalikan ang nabilin nga tactical bag nga nabilin sa hagdanan sa ikaduhang andana sa maong dakbalay diin milanog ang mga buto-buto sa armas.
Gitago pa karon ang identity sa maong dinakpan apil na ang naka-aresto kaniya alang sa dugang imbestigasyon.
Apan sigon ni Senadora Imee, mitug-an ang dinakpan nga gisugo matud pa siya sa iyang boss nga usa ka Atty Jerome Bomediano sa NBI Anti-Organized and Transnational Crimes Division aron dakpon si Senador Ronald ‘Bato’ de la Rosa gamit ang arrest warrant gikan sa International Criminal Court kon ICC.
Tungod niini, gipanawagan sa senadora si Bomediano nga ipasabot ang nahitabong komosyon sa Senado nga miresulta sa pagpabuto sa mga armas ug lockdown sa Senado nga naghatag og tensyon sa mga tawong anaa sulod sa premises.
