BUTUAN CITY – Misaka ang utang sa Pilipinas ngadto sa P18.49 trilyon sa katapusan sa Marso, tungod sa paghuyang sa salapi ug bag-ong lokal nga panghulam nga nagpataas sa total nga obligasyon.
Misaka ang kinatibuk-ang utang og 1.8 porsyento o P328.43 bilyones gikan sa lebel sa Pebrero base sa pinakabag-ong datos nga gipagawas sa Bureau of the Treasury.
Ang maong pagsaka dako og epekto sa pagtaas sa bili sa utang nga denominated sa foreign currency tungod sa paghuyang sa piso batok sa US dollar kondiin sa maong bulan, ang piso mihuyang og kapin tres-pisos kontra dolyar.
Ang domestic debt miabot sa P12.53 trilyon, kansa misaka og 0.44 porsyento gikan sa miaging bulan tungod sa net issuance sa government securities samtang nagpadayon ang gobyerno sa pagkuha og pondo sa lokal nga merkado alang sa national budget, ug ang paglihok sa currency midugang og P8.68 bilyon sa bili sa foreign-currency domestic holdings.
Ang external debt misaka og mas dako pa, hapit 5 porsyento, ug miabot sa P5.95 trilyon sa katapusan sa unang quarter. Bisan pa nga adunay net repayments nga P2.55 bilyon, ang pagkunhod sa bili sa piso midugang og P299.5 bilyon sa total nga foreign obligations.
Gipahibalo usab sa Bureau of the Treasury nga ang guaranteed obligations misaka ngadto sa P381.41 bilyon, nga halos 11 porsyento nga pagtaas kumpara sa katapusan sa 2025, samtang nagpadayon ang gobyerno sa pag-atubang sa global currency volatility.
