BUTUAN CITY – Usa ka barko ang gidudahang gigamit isip “floating armoury” sa Gulf of Oman ang matud pa gikumpiska sa mga ginsakpan sa militar sa Iran, sumala sa maritime risk management company.
Nasayran nga katapusang nakita ang Honduras-flagged vessel nga Hui Chuan sa 70 kilometros amihanang sidlakan sa Fujairah sa United Arab Emirates niadtong Miyerkules.
Sumala sa operator sa Hui Chuan, gigamit matud pa ang barko isip floating armoury o pondohanan sa armas para sa mga private security firms nga nagprotekta sa mga barko batuk sa mga pag-atake sa mga pirata sa kadagatan.
Bisan paman niini, wala pa makumpirma kung unsa nga klaseng armas ang sakay sa barko ug kinsa ang migamit niini.
Una nang gitaho nga sagad gigamit ang mga floating armoury vessels sa Red Sea, Gulf of Aden, ug Gulf of Oman aron magsilbing drop-off ug collection point sa mga armas ug ammunition para sa maritime security personnel.
