BUTUAN CITY – Nakatala og dakong pagsaka ang inflation rate sa rehiyon sa Caraga.
Base sa taho sa Philippine Statistics Authority-13, nga gikan sa 3.6 percent niadtong Pebrero misaka kini sa 5.5 percent sa Marso.
Nanguna sa pagsaka sa inflation ang sektor sa transportasyon nga adunay pinakadakong natampo sa kinatibuk-ang inflation nga miabot sa 52.3 percent.
Misaka ang inflation sa transportasyon gikan sa 0.8 percent sa Pebrero ngadto sa 11.9 percent sa Marso.
Nag-unang hinungdan niini mao ang taas nga pagsaka sa presyo sa gasolina nga miabot sa 27.8 percent sa Marso gikan sa -4.4 percent sa Pebrero, ug diesel nga misaka usab sa 59.9 percent gikan sa 0.5 percent.
Lakip sa dako nga kontribusyon sa inflation mao ang food and non-alcoholic beverages nga adunay 40.6 percent nga natampo. Misaka usab ang inflation niini sa 4.2 percent gikan sa 2.4 percent sa miaging bulan.
Ang gakong hinungdan sa pagsaka sa presyo sa pagkaon mao ang bugas nga misaka gikan sa -1.8 percent sa Pebrero ngadto sa 5.3 percent sa Marso.
Lakip sa nakatampo usab sa inflation ang sektor sa housing, water, electricity, gas and other fuels nga adunay 5.8 percent nga bahin, nga misaka sa 7.8 percent sa Marso gikan sa 7.1 percent sa Pebrero.
Sa lebel sa probinsya, ang Dinagat Islands adunay pinakataas nga inflation nga 7.7 percent gikan sa 4.5 percent, samtang ang Agusan del Sur adunay pinakagamay nga inflation nga 4.5 percent gikan sa 3.1 percent.
Ang inflation rates sa Agusan del Norte 6.7 percent gikan sa 5.2 percent; Surigao del Sur 4.6 percent gikan sa 2.1 percent; Surigao del Norte 5.3 percent gikan sa 3.2 percent; ug Butuan City 7.3 percent gikan sa 5.4 percent.
