BUTUAN CITY – Gi-discharge na kagahapong adlawa gikan sa Caraga Regional Hospital sa Surigao City ang ikaduhang COVID-19 positive ning rehiyon pinaagi sa usa ka 65-anyos nga lalaking Butuanon.
Gikumpirma kini ni Ma. Cecilia Bayana – tigpamaba sa maong tambalanan dungan sa pagbutyag nga tungod kini sa pagnegatibo na niya sa ika-unom na niyang swab follow-up test.
Sa eksklusibong pakighinabi sa Bombo Radyo Butuan, gibutyag sa opisyal nga ang ka-fighter sa maong pasyente ang hinungdan sa iayng pagkarekober ug sa iyang pagpa-uli, gitambagan gihapon siyang mag-home quarantine o i-isolate aron lang masigurong dili na kini makatakod pa.
Nahimo pang emosyunal ang pagpagikan sa mga health workers ngadto kaniya nga gihimuan pa og tribute video.
Sa pagkakaron, gi-andam na usab nila ang maong ospital alang sa posibleng laing COVID-19 patient nga madala na usab unya aron ilang atimanon.
