BUTUAN CITY – Gihangyo karon sa mga prosecutors sa International Criminal Court ang mga huwes nga ipagawas sa publiko ang pipila ka bahin sa redacted defense filing ni kanhi Rodrigo Duterte nga gitago kaniadto tungod kay wala matud pa’y igo nga rason aron himuong sekreto ang maong impormasyon kansa makapaguol matud sa mga testigo.
Sa ilang gisubmiteng hangyo nga pinetsahan og Abril 24 ngadto sa Pre-Trial Chamber I, gusto sa Office of the Prosecutor nga i-reclassify ang tubag sa depensa nga gitago gikan sa publiko.
Sumala sa mga prosecutors, adunay gibutyag ang kampo ni Duterte nga unom ka abogado nga sila Salvador Medialdea, Salvador Panelo, Martin Delgra, Silvestre Bello, Alfredo Lim, ug Cesar Dulay kinsa dili kabahin sa legal team ni Duterte sa ICC apan kini nga bahin gitangtang sa publikong bersyon sa dokumento .
Sigon sa prosecution, dili igo nga rason ang pagpanalipod sa dignidad sa mga abogado aron tagoan ang impormasyon tungod kay kinahanglan transparent ang proseso sa korte.
Mitumaw ang hangyo tungod sa kabalaka sa mga prosecutors nga basin malibog ang mga testigo ug biktima kung kinsa gyud ang kabahin sa legal team ni Duterte ug posible usab nga mahadlok ang mga testigo kung magtuo sila nga adunay mga tawo nga konektado kang Duterte nga makakita sa sensitibong impormasyon sa kaso.
Dugang pa nila, ang uban sa maong mga abogado, adunay taas nga posisyon kaniadto sa gobyerno sa panahon ni Duterte, nga sakop sa imbestigasyon sa ICC bahin sa giingong mga krimen.
Nasayrang ang Pre-Trial Chamber I sa ICC gilangkuban nila Judges Iulia Antoanella Motoc, Reine Adelaide Sophie Alapini-Gansou, ug Maria del Socorro Flores Liera
