BUTUAN CITY – Hustisya ang singgit sa pamilya Kintanar human nasayrang wala’y dautang gihimo ang mangingisdang si Ikiel Kintanar, 31-anyos, minyo ug residente sa Purok 1, West, Brgy. Calibunan, Cabadbaran CIty sakop sa lalawigan sa Agusan del Norte.
Sa eksklusibong pakighinabi sa Bombo Radyo Butuan, gipadayag ni Leslie Kintanar, asawa sa biktima nga kinahanglang mahatagan og hustisya ang nadangatan sa iyang bana ilabina nga gagmay pa ang ilang lima ka mga anak kondiin ang kamaguwangan, nag-edad pa lang og 12-anyos samtang usa ka tuig kapin pa ang kamanghuran.
Saysay pa ni Leslie, diha na niya gipa-abot sa baybay ang iyang bana human siya gipahibalo sa mga ka-ubanan niining napusilan kini. Dako ang iyang kadismaya tungod kay wala na kini maka-abot pang buhi human nila gidala sa ospital.
Mala-umon usab si Leslie nga unta dili ihikaw kanila ang hutisya ilabina nga taga-gobyerno matud pa ang ilang kontra.
