BUTUAN CITY – Wala’y laing mabasol ang usa ka pamilyang Higaonon sa Hinatuan, Surigao del Sur sa paghikog sa usa ka grade-8 nga estudyante kondili ang gilisdan niining module sa subject nga Science.
Sa eksklusibong pakighinabi sa Bombo Radyo Butuan, gipadayag ni Nanay Luzminda, apuhan sa biktimang gitago lang sa pangalang Inday kinsa legal nang gisagop sa apuhan, wala’y laing gireklamo kaniya ang dalagita kondili ang kalisod matud pa sa Science module nga mao matud pa’y nagpalabad sa iyang ulo.
Sigon ni Nanay Luzminda, wala masubmite sa biktima niadtong Lunes ang iyang unang module tungod sa kay wala niya kini ma-answeri ug dili usab niya kini matabangan tungod kay grade 1 lang ang iyang nahuman hinungdan nga nagpina na matud pa ang biktima nga mu-undang na kay naglabad na ang iyang ulo ilabina nga wala’y makatudlo kaniya.
Dugang pa ni Nanay Luzminda nga gisita pa sa iyang manghod ang iyang anak nga basin manundog sa ubang mga estudyanteng gipang-post sa Facebook kinsa naghikog tungod sa kalisod nga ilang nasinatian sa pagtubag sa mga modules kondiin mibasa pa kini sa susamang posts.
Misaad usab ang biktima nga buhaton niya ang tanan nga dili makasab-an tungod lang sa wala matubaging module apan wala sila magtuo nga kutlu-on niini ang iyang kinabuhi didto sa ilang ilaya kinsa wala na matabang pa gumikan kay duha ka oras na ang milabay dihang ila kining natultulan human mibiya sa ilang panimalay.
