BUTUAN CITY – Gikonsidera na karon sa International Criminal Court (ICC) Registry si kanhi Pangulong Rodrigo Duterte nga “elderly detained person” kansa duna’y taas nga risgo sa pagkahulog ug pagkatumba rason nga anaa siya ilalom sa padayong cell monitoring.
Gipasabot sa ICC nga sa mga panahong nadam-ag si Duterte, daling nakaresponde ang custody staff kondiin gitabangan siya ug daling mitawag og medikal nga pagsusi.
Gipadayag usab sa ICC nga wala pa’y natalang insidente sa pagkahulog o pagkatumba sa kanhi pangulo ning mi-aging usa ka buwan.
Dugang pa sa ICC, himuon ang mga kinahanglang adjustments sa iyang selda ug kagamitan aron masiguro ang iyang kaluwasan.
Bisan pa man, wala na gidetalye pa sa ICC ang mga chronic ailments sa kanhi pangulo tungod sa medical confidentiality.
Ang 81-anyos nga si Duterte, nag-atubang og mga kasong crimes against humanity kalabto sa war on drugs ug sa Davao Death Squad.
Niadtong Abril 23 ning tuiga, gikumpirma sa ICC ang mga kaso batuk kaniya, lakip na ang murder ug attempted murder.
Tumong sa update sa ICC nga ipakita sa tibuok kalibutan nga padayon nilang gibantayan ang panglawas ug kaluwasan sa kanhi pangulo samtang nagpadayon ang pag-abante sa iyang kaso.
