BUTUAN CITY – I-turn over ngadto sa issuing court ang usa ka kanhi high ranking official sa New People’s Army kon NPA nga nadakpan sa checkpoint operation didto sa national highway sa Sitio Tagmalinao, Brgy. La Purisima, Cagwait Surigao del Sur ning mi-aging gabii.
Naila ang nadakpang si Renan Ayad Cantos, alyas Loki/Ronin/Sanjo 30-anyos ug residente sa Purok Pagbahanan 2, Brgy. Poblacion, Marihatag, Surigao del Sur.
Sa pakighinabi sa Bombo Radyo Butuan, giklaro ni PMajor Renel Serrano – information officer sa Police Regional Office kon PRO-13, nadakpan ang suspek human gisubay pinaagi sa e-warrants sa PNP ang record niini dihang wala’y napakitang driver’s license ingon man OR ug CR sa gimanihuan niining motorsiklo gawas nga wala pa kini naka-helmet.
Dinhi na nasuta nga duna kini napulo ka mga arrest warrants sa managlahing kaso sama sa Multiple Attempted Homicide, Frustrated Murder, 2 ka ihap sa kasong Multiple Attempted Murder, Murder , tulo ka ihap sa Kidnapping and Serious Illegal Detention ug Robbery with Violence and Intimidation.
Migawas pa sa ilang pagpanubay nga kanhi kini commanding officer sa nabungkag nga Guerilla Front 8 ug sa nadis-mantle nga Guerilla Front 14 sa sa North Eastern Mindanao Regional Committee kon NEMRC sa NPA.
Kamatu-uran niini, apil ang hulagway ni Cantos sa gipangbitay nga tarpaulins sa mga lugar nga makita dayon sa katawhan sama sa mga police stations ug checkpoints.
Apil sa gisikop ang usa ka babayeng angkas niini nga taga-San Miguel, Surigao del Sur.
