BUTUAN CITY – Padayon pang gipakisayran sa kapulisan sa Bislig City kung adunay nahitabong foul play diin namatay ang usa ka Locally Stranded Individual (LSI) human matod pa mi-ambak sa ambulansya.
Naila ang biktima nga si Lanie Taray, 26 anyos, usa ka engineer ug residente sa Purok-2 Cagui-on, Brgy. Tabon, sakop sa maong syudad.
Sumala ni PLTCOL Wilson Corpuz, hepe sa Bislig City Police Station, gi-asoy sa driver sa ambulansya ug kaubanan niini nga bandang ala-1:20 sa hapon gikuha sa ilang panimalay ang biktima aron dad-on sa quarantine facility sa lugar apan pag-abot sa National Highway, Brgy. Maharlika, Bislig City, Surigao del Sur, gi-abrehan matud pa sa biktima ang pultahan sa ambulance dayong ambak resulta sa iyang kamatayon.
Dali pang gidala sa ospital ang biktima apan gideklara kining dead on arrival sa attending physician.
Dali usab nga mitugyan sa ilang kaugalingon ang driver sa ambulance nga si Jeyrex Tuburan Garrido, 24 anyos, taga P-7 Castillo Village, Mangagoy, Bislig City ug ang kaubanan niini nga sakay nga si Johnrey Benore, 21 anyos nga parehong contract of service.
