BUTUAN CITY – Padayon pa ang pagpakuha og dugo sa mga Caraganons nga miduyog sa tinuig nga Dugong Bombo 2019 ‘A Little Pain, A Life to Gain’ – usa ka blood-letting activity sa Bombo Radyo Philippines network sa tumong nga makabaton og igong supply sa dugo ang mga blood banks sa tibuok nasud.
Dinhi sa dakbayan sa Butuan, nagkahi-usa ang mga local government officials, mga ordinaryong tawo, kasundaluhan, kapulisan og mga medical staff aron mulampos ang maong kalihukan.
Sigon ni Association of Barangay Captains kon ABC-Butuan City Federation President Gemma Tabada, dakong tabang ang blood-letting activity sa Bombo Radyo ilabina nga kulang ang supply sa dugo dinhi sa dakbayan sa Butuan.
Kini tungod kay dili lang ang mga taga-Butuan ang mu-avail sa blood supplies nga anaa sa mga ospital og mga blood banks ning siyudad kondili apil na kadtong mga residente sa kasikbit nga mga lalawigan.
Sa eksklusibong pakighinabi sa Bombo Radyo Butuan, gibutyag ni Banza Brgy. Captain Tabada nga gawas nga boluntaryo ang pagdonar og dugo, ato usab kining social responsibility aron matabangan ang mga tawong nanginahanglan niini.
