BUTUAN CITY – Naghayag og suporta para sa posibleng panag-ubang Vice President Sara Duterte ug kanhe Ilocos Sur governor Chavit Singson sa 2028 national elections, ang usa ka grupo nga nagpailang “former loyalists” ni Pangulong Ferdinand Marcos Jr. ug sa iyang amahan.
Sa usa ka press conference, gibutyag sa gibansagang Sara-Chavit 2028 Nationwide Movement nga gelayon silang nagkahiusa human ang anunsyo ni Sara Duterte nga modagan siya sa pagkapangulo sa 2028.
Sumala sa grupo, nagtoo silang kaya ni Duterte nga dalhon ang iyang kasinatian isip kanhe mayor sa Davao City sa mas lapad nga pagdumala sa nasudnong lebel partikular sa hisgutanang ekonomiya, kalinaw og kahapsay og kalambuan.
Gisugyot usab sa grupo si Singson isip posibleng ka-tandem ni Duterte sa pagka-bise presidente, nga matud pa dunay kapasidad ug kasinatian sa serbisyo publiko, base sa iyang nahimong pagdumala sa Ilocos Sur.
Bisan paman giangkon sa grupo nga wala pa nila pormal nga nahisgutan ang endorsement kang Singson ug wala pa gihapoy direktang komunikasyon sa iya mahitungod sa nasangpit nga plano.
Una nang gibutyag ni VP Sara nga duna na siya’y napiling running mate apan dili pa niya kini ibulgar aron maprotektahan matud pa sa pulitika.
