BUTUAN CITY – Aminado ang Department of Health kon DOH-Caraga nga padayon ang local transmission karon sa COVID-19 dinhi sa rehiyon ug paspas pa.
Sa ekskluksibong pakighinabi sa Bombo Radyo Butuan, gipadayag ni DOH-Caraga regional epidemiologist Dr. Gerna Manatad nga human ang upat ngadto sa unom ka buwang pagkunhod sa kaso sa COVID-19 dinhi sa rehiyon, misaka na usab kini karon nga kanunay nang anaa sa triple digit.
Tungod niini, kada-semana silang duna’y coordination meeting tali sa mga Local Inter-Agency Task Force aron masayran ug mapahibalo ngadto sa publiko ang mga lugar nga duna’y pagsaka sa COVID-19 cases.
Pinaagi matud pa sa ilang koordinasyon, masayran kung pila ka porsiento ang gisaka sa kaso kumpara sa mi-aging semana.
Dugang pa ni Dr. Manatad, apil sa ilang makuting gibantayan karon ang clustering sa mga COVID-19 cases diha sa kabaranggayan ug kalungsuran aron magpatuman gilayon og tukmang lakang sa ingon dili na kini mukaylap pa pinaagi sa community aggressive testing.
Kini tungod na usab sa ilang paningkamot nga dili masudlan og Delta variant ang Caraga kansa mao na lang ang bugtong rehiyon sa nasud nga wala makatala niini nga variant.
Subay niini, nanawagan siya sa katawhan nga kung makamatikod nga nakasinati na og mga simtomas sa COVID-19, dili na mugawas pa sa balay ug magpahibalo gilayon sa mga opisyal sa barangay aron mapa-ilalom sa saktong proseso sa pagsusi kung duna sila’y coronavirus.
