BUTUAN CITY – Nagpagawas og pahinumdum ang Department of Health kon DOH sa publiko kung unsay buhaton aron malikayan ang pagkuyanap sa Hantavirus diin importanteng ipabilin ang limpiyo nga palibot og kaugalingon.
Pahinumdum sa buhatan, importante nga walay bisan unsang ilaga sa palibot ilabina kay kini ang nagdala og sakit nga Hantavirus Pulmonary Syndrome (HPS) sa tawo.
Base sa pagtoon, mokaylap kini sa ihi, hugaw ug laway sa ilaga nga kasagarang anaa sa hugaw nga lugar.
Ang HPS kon Hantavirus Pulmonary Syndrome usa ka grabeng sakit nga mamahimong magdala sa kamatayon kung dili maagapan.
Sumala sa United States Centers for Disease Control and Prevention, halos upat sa matag 10 ka kaso sa Hantavirus Pulmonary Syndrome (HPS) ang namatay tungod sa komplikasyon niini.
Sa karun, walay kumpirmadong kaso sa HPS sa Pilipinas rasong ubos ang risk sa pagkaylap niini, importanteng ipabilin pa gihapon ang kalimpiyo.
Apan gipaneguro usab sa DOH nga andam ang mga tugpahanan ug pantalan sa border screening sa DOH-Bureau of Quarantine (DOH-BOQ).
