BUTUAN CITY – Gipahayag sa kalihim sa Department of Agriculture nga si Francisco P. Tiu Laurel Jr. nga nakaseguro na ang ahensya og 50-milyones pesos nga sub-allotment aron ipatuman ang fuel assistance alang sa liboan ka mga mag-uuma karung padayon misaka ang pangkalibutanong presyo sa lana nga epekto sa lokal nga ekonomiya.
Sumala sa opisyal nga sa maong programa maghatag og 5-mil pesos matag usa sa 9,570 ka mag-uuma nga nagsalig sa mekanisadong kagamitan, base sa datos sa Bureau of Agricultural and Fisheries Engineering kon BAFE sa ahensiya.
Tumong sa maong tabang nga mapagaan ang dali nga epekto sa pagsaka sa gasto sa gasolina, nga direkta nakaapekto sa produksyon ug transportasyon sa sektor sa agrikultura.
Apan giklaro niini Ang mga mag-uuma nga kwalipikado alang sa maong cash assistance mao lamang kadtong nakalista sa Registry System for Basic Sectors in Agriculture.
Una nang gipahibalo ni Pangulong Ferdinand Marcos jr ang dunay fuel subsidy alang sa mga mag-uuma og mangingisda nga miabot ang pondo sa 10-bilyones pesos. Apan nagpadugang kini og 50-milyones sa mga field offices.
