BUTUAN CITY- Gi-awhag ni Nelson Caranzo, Community Environment and Natural Resources Office kon CENRO sa Nasipit, Agusan del Norte, ang mga residente nga pahimuslan ang Permitting on Wheels sa Department of Environmental and Natural Resources kon DENR Caraga nga ipahigayon sa City Hall karong Hulyo 28 ug 29 aron mapadali ang pagproseso sa nagkadaiyang serbisyo sa ahensya.
Sumala niini, mha kini kabahin sa kampanya sa gobyerno alang sa pagpapaspas sa paghatag og serbisyo publiko ug pagpalig-on sa ease of doing business, ilabina sa pag-aplay alang sa mga titulo sa yuta, pagkuha og Legal Tree Cutting Permit, Agricultural Tree Cutting Permit, ug ubang espesyal nga permit alang sa mga eskwelahan sulod sa ilang area of responsibility.
Gipasabot usab ni Caranzo, nga mahimo usab nga didto iproseso ang pagparehistro sa chainsaw, diin libre ang notaryo sa tanang aplikasyon pinaagi sa mga legal officer sa DENR.
Dugang paniini, mahimong makakuha og giya ang mga aplikante sa pag-isyu sa revocable permit alang sa mga angayang lugar, ingon man sa land verification ug land status verification aron masayran sa mga nag-okupar sa yuta ang tinuod nga kahimtang ug legal nga estado sa ilang giangkon nga kabtangan.
