BUTUAN CITY – Human wala madayon ang gitakdang general assembly sa Cooperative Development Authority kon CDA-Caraga alang sa Diamond Transport Service Cooperative kon DATSCO niadtong Miyerkules, Agusto 25, nagduso karon og notisya ang grupo ni Romeo Ednilan nga himuon nila kini karong Septembre 2 didto sa Buenavista, Agusan del Norte.
Sa eksklusibong pakighinabi sa Bombo Radyo Butuan, gipadayag ni Ednilan nga ang gi-require lang sa CDA kanila mao ang pagpang-apod apod sa notisya sulod sa usa ka semana kansa mao karo’y ilang gipangpaspasan paghatud apil na ngadto sa mga ka-abin sa ilang chairman nga si Evangelus ‘Evans’ Lawenko.
Sigon ni Ednilan, ang wala mudawat sa ilang gipanghatud nga notice, ila na lang gipang-picturan isip ebidensya.
Gipaneguro ni Ednilan nga makatambong sa maong tigom ang mayoriya sa ilang mga ka-ubanan base na usab sa ilang gilusad nga signature campaign niadtong wala pa masibog ang Agusto 25 nga gitakdang asembliya kansa gisibog ra sa grupo ni Lawenko sa rasong duna na matud pa’y una nilang gi-eskedyol nga sequential assembly.
Dugang pa ni Ednilan, bisan og gihatagan na sila og go-signal sa CDA alang sa ipahigayong general assembly, duna pa gihapo’y mga kagrupo ni Lawenko ang nagpadayag nga magpatawag sial og ila usab nga general assembly.
Gikataw-an usab niini ang una nang gipadayag ni DATSCO spokesman Ronald Dizon nga magduso sila og temporary restraining order aron lang mababagan ang gitakdang asembliya sunod bulan.
Sigon ni Ednilan, unang higayon niya kining nadunggan dungan sa pagpasabot nga bahala na sila kung unsa ang ilang buhaton sa desisyon sa CDA human ang taas nga panahong gihatag niini ngadto sa ilang mga opisyal aron lang mapahigayon na ang asembliya.
