BUTUAN CITY – Emosyunal nga midangop sa Bombo Radyo Butuan ang usa ka inahan aron magpatabang nga mapapa-uli ang iyang 17-anyos na nga dalagitang anak kinsa niadto pang Disyembre 4 na-missing.
Sa eksklusibong pakighinabi sa Bombo Radyo Butuan, gi-asuy sa inahang si Charisse Capua, 41-anyos, residente sa Brgy. Isidro, lungsod sa Santiago, Agusan del Norte, lima ka adlaw nang wala makapa-uli ang iyang anak nga si Charity gikan nagkuha og module.
Bisan asa na sila mi-adto ug nagpa-blotter na usab sila sa police station apan wala gihapon nila kini makita rason sa grabe na nila karong kaguol.
Ang gikabalak-an pa sa inahan tungod kay napa-akan kini og iro sa iyang wa-it rason nga dili mawala sa iyang huna-huna nga basin na-apektuhan kini sa posibleng rabis nga dala sa iro.
Nanawagan na lang siya sa tanang nakakita sa iyang anak nga nagpaputol na karon og buhok ug duna’y deprensya sa iyang mata nga i-report gilayon kini sa kapulisan sa Santiago ug bisan na dinhi sa sibyahan sa Bombo Radyo aron mawala na ang ilang mga kabalaka.
