BUTUAN CITY – Unexpected sa katawhan sa Germany ang kadako sa bul-og sa tubig-baha nga hatud sa kada-adlaw nga kusog nga pagbundak sa ulan kansa duha ka semanang mibundak.
Kini ang gi-asuy sa Butuanon nga si Butch Wessinger direkta gikan sa Stuttgart, Germany sa eksklusibong pakighinabi sa Bombo Radyo Butuan, kondiin gipadayag niini nga tungod sa kakusog sa pagbundak sa ulan, milanap ang tubig-bana sa ilang suba apan mas nagrabehan ang Federal States sa North Rhine-Westphalia ug Rhineland-Palatinate hinungdan nga mi-abot na karon sa 160 ang ihap sa mga nakalas samtang padayon pang gisuta ang ihap sa kinatibuk-ang missing.
Ang kakusog sa impact nga mugna sa mga dagkong bato ug mga nalukat nga kahoy gikan sa kabukiran ang hinungdan sa kalapad sa damyos nga hatud sa maong kalamidad diha sa kasyudaran nga naagi-an niini.
Gani ang pinakadakong suba sa maong mga estado nga mao ang Rhine Pals nga agi-an sa mga barko ilabina sa mga container ships, nga padulong sa Holland ug uban pang mga nasud sa Urupa, grabe man ang pagsugwak sa tubig-baha nga mi-abot na sa ilang super highway.
Base sa iyang nasayran, duna’y mga Pinoy usab nga nabahaan apan wala sya’y nadunggan nga duna’y nakalas tungod sa maong kalamidad.
Wala matud pa’y angayang kabalak-an tungod kay hands-on ang German government aron makabangon gilayon ang mga apektado sa lapad nga pagbaha samtang silang mga Pinoy, magtinabangay usab higayong duna’y mabiktima sa ingon niini nga kalamidad.
