BUTUAN CITY – Gikumpirma sa Police Regional Office 3 kon PRO-3 sa ilang intial findings nga ang kusog nga balod usa sa gitan-aw nga hinungdan sa pagkalumos-patay sa duha ka basketball student-athletes sa Ateneo de Manila University sa probinsya sa Aurora.
Na-ila ang mga namatay nga sila si Rene Baterbonia ug Divine Adili, nga parehong membro sa Ateneo basketball program kinsa namatay samtang mi-apil sa usa ka team-building activity.
Base sa inisyal nga imbestigasyon sa Aurora Provincial Police Office, gibutyag ni acting Provincial Director PCol. Percival Pineda, nga aksidente gayod matud pa ang nahitabo sa duha ka mga biktima dihang nadala sila sa kusog nga balod nga nagdala kanila sa mas lawom nga bahin sa dagat.
Gidala pa sa ospital ang duha ka biktima, apan gideklara sila nga dead on arrival sa mga doktor.
Nagpadayon pa ang imbestigasyon sa kapulisan sa insidente, samtang nanawagan sila sa publiko nga likayan ang mga panaghap ug hulaton ang pinal nga resulta sa imbestigasyon.
Nagpahimangno usab ang PNP sa mga turista nga magmatngon sa mga kalihokan sa dagat, labina sa mga lugar nga adunay kusog nga balod, ug mosunod sa mga safety advisories.
Nagpa-abot na usab og pahasubo ang PRO-3 ngadto sa pamilya ug mga mahal sa kinabuhi sa mga biktima.
Si Baterbonia una untang magdula isip rookie sa UAAP Season 89, samtang ang Nigerian national nga si Adili nakadula na sa UAAP Season 88 isip import player.
