BUTUAN CITY – Nakatala ang lokal nga kagamhanan sa Quezon City sa 146 ka kaso sa COVID-19 hangtud niadtong Hulyo 1, sumala sa datos sa City Epidemiology and Surveillance Division (QCESD).
Sa report sa lokal nga kagamhanan, mitaas og kapin 265% ang mga kaso sa sulod lang sa tulo ka semana. Gikan sa 23 ka kaso nga natala niadtong Mayo 21 hangtud Hunyo 10, misaka kini sa 84 kaso gikan sa Hunyo 11 hangtud Hulyo 1.
Base sa datos, pinakadaghang nataptan ang mga batang 14-anyos paubos nga gilangkuban sa halos 30% sa katibuk-ang kaso. Misunod ang mga edad 25 hangtud 29, ug mga senior citizens nga 60 pataas, nga parehong anaa sa kapin o kulang 16%.
Mas daghan usab ang natalang kaso sa mga kababayen-an kumpara sa kalalakin-an.
Dunay pipila ka healthcare workers nga nataptan sa virus.
Pinakataas nga kaso ang gikan sa District 4 ug District 1 sa siyudad. Sa mga barangay, nanguna ang Barangay Doña Imelda nga dunay 11 kaso samtang pipila ka barangay sama sa Culiat, Sauyo, Tandang Sora, ug uban pa nga dunay tag-upat nga kaso.
Padayon nga gimonitor sa QCESD ang sitwasyon ug gi-aghat ang mga residente nga gelayon nga magpakonsulta kung dunay sintomas sa sakit sa pagginahawa o hinay ang resistensya.
Nagpahinumdum usab ang QC Health Department sa publiko nga mag-amping pinaagi sa tukmang pagtabon ugaling mag-ubo ug mohatsing, kanunay nga paghugas sa kamot, pagsuot sa mask kung dunay sakit, ug paglikay sa daghang tawo nga lugar kung dili maayu ang pamati.
