BUTUAN CITY – Mi-abot na karon sa 1,382 ang kumpirmadong kaso sa COVID-19 dinhi sa Caraga Region human nadugangan og 65 ka mga bag-ong kaso kagahapong adlawa.
Base sa situational report nga gipagawas kaganina sa Department of Health-Center for Health and Development kon DOH-CHD Caraga, sa bag-ong nadugang nga mga kaso, usa niini ang health care worker, duha ang duna’y travel history sa lugar nga duna’y local transmission sa maong sakit samtang 62 ang mga local transmission.
Sa kinatibuk-ang ihap usab sa tibuok rehiyon, 485 niini ang mga aktibong kaso, 850 ang nakarekober samtang 478 na ang patay human nadugangan usab og tulo ka mga bag-o.
Sa 65 ka mga bag-ong kaso, 35 ang mga babaye kansa 54-porsiento ug 30 ang mga lalaki kon 46-porsiento kondiin 63-porsiento kanila ang anaa sa edad nga 21 ngadto sa 50-anyos, pinakabata ang 2-anyos samtang 84-anyos ang pinakatiguwang.
Pinakadaghan sa bag-ong kaso natala sa Butuan City nga mi-abot sa 44 nga gisundan sa 10 ka mga kaso sa Bislig City, Surigao del Sur; 2 sa Bislig City; 4 sa Agusan del Sur nga naggikan sa mga lungsod sa San Francisco-3 ug usa sa Prosperidad.
Tulo usab ang natala sa Agusan del Norte nga natala sa lungsod sa Nasipit-2 ug Las Nieves-1 samtang usa usab sa lungsod sa Marihatag sa Surigao del Sur.
