BUTUAN CITY – Tungod sa dili paborableng weather conditions, ilabina sa pag-take-off og pagtugpa sa Siargao Islands sakop sa lalawigan sa Surigao del Norte, pipila ka mga flights ang gikansela sa Cebgo Inc., karong adlawa subay na usab sa gikatakdang pag-landfall sa bagyong Samuel unyang gabii.
Apil na niini ang ilang mga flights nga DG 6851/6852 nga duna’y rutang Cebu-Siargao-Cebu, DG 6841 nga Manila-Siargao, DG 6858 Siargao-Cebu, DG 6839/6840 Manila-Siargao-Manila, og DG 6895/6896 Cebu-Surigao-Cebu.
Gituyo kini sa kadumalahan sa maong airline company aron maseguro ang kaluwasan sa tanang mga biyahidor.
Samtang as of alas-8:00 kagabii, nakatala na ang Philippine Coast Guard kon PCH-Surigao City og na-stranded nga 22 ka mga pasahero sa duha ka mga pantalan sa maong siyudad, wala’y labot pa sa 19 ka mga rolling cargoes, 5 ka mga barko og 3 ka mga motorbancas subay na sa gipatumang ‘No Sailing Policy’.
Isip kabahin sa ilang preparasyon sa paghapak sa bagyong Samuel, andam na ang mga non-food items sa Department of Social Welfare and Development kon DSWD Field Office. Apil niini ang mga habol, dignity Kits, hygiene Kits, kitchen Kits, family Kits, laminated sacks, malong, mosquito nets, banig og uban pa nga nagkantidad sa kinatibuk-ang 9-milyunes, 909-mil, 303-pesos og 80-sentabos.
Kini gawas pa sa standby fund nga usa ka miyon, 929-mil, 566-pesos og 75-sentabos.
Anaa pa ang 18,304 ka mga family food packs nga nagkandtidad og P5,621,890.56 gawas pa sa 5,985 ka mga family food packs nga nagkantidad og P1,838,232.90 kansa naka-preposition sa gi-abangan nilang warehouses sa Tandag City sa Surigao del Sur, Prosperidad sa Agusan del Sur og sa Brgy. San Jose sa Surigao City. (Beth Ruiz)
