BUTUAN CITY – Supak ang grupo sa Caraga Butuan Transport Service Cooperative kon CARBUTRANSCO sa himuong transport strike sa kauluhan sugod ugmang adlawa Lunes, Marso 6.
Sumala ni CARBUTRANSCO Chairman Ricky Sanchez, wala sila maka-uyon sa himoong strike sa ilang mga ka-ubanang drivers sa kauluhang Manila tungod kay isip anaa sa transportation sector, dapat available sila kanunay ngadto sa mga sumasakay.
Gipasabot pa niini nga ang gihingusgang Public Utility Vehicle kon PUV Modernization Program sa Land Transportation, Franchising and Regulatory Board kon LTFRB, alang man sa ilang kaayuhan.
Gihangyo usab niini ang uban pang mga transport groups nga suportahan ang gobyerno, ilabina sa panahon nga kinahanglan na ang modern vehicles aron paglambo sa transportasyon sa nasod.
Gihangyo usab sa maong sector ang publiko nga musabot sa gihimo sa gobyerno sa natad sa transportasyon sama kanila nga 100% nilang suportado ang transportation modernization program.
Samtang dili musuporta sa usa ka semanang hunong-pasada nga sugdan ugmang adlawa Lunes, Marso 6, ang Balangay Transport Service Copperative kon BALTRANSCO tungod kay suportado nila ang Public Utility Vehicle kon PUV Modernization Program sa Land Transportation, Franchising and Regulatory Board kon LTFRB.
Sa eksklusibong pakighinabi sa Bombo Radyo, gipadayag ni BALTRANSCO chairman Juanito Ubas nga panahon na aron suportahan ang maong programa aron muha-um usab sa kalambuang gitinguha sa nasudnong kagamhanan tungod kay prayuridad nila ang kaluwasan sa mga pasahero samtang ang mga nagdagan karon nga traditional jeepneys, karaan na.
Nakita matud pa nila ang dakong kaayuhan sa maong programa kondiin kaabag nila ang kagamhanan sa investment sa mga modernong sakyanan.
Kamatu-uran matud pa sa kaayo niini ang lima na ka mga transport service cooperatives nga namugna na dinhi sa Caraga Region.
