BUTUAN CITY – Mi-uyon ang Regional Task Force COVID19-One Caraga Shield nga tangtangon na ang enhanced community quarantine kon ECQ sa lima ka probinsiya sa rehiyon ug ipatuman ang general community quarantine kon GCQ epektibo ugmang adlawa.
Apan si Butuan City Mayor Ronnie Vicente Lagnada nagrekomenda nga ipabilin ang siyudad sa ilalom sa ECQ diin gihulat pa karun ang pag-apruba sa Inter-Agency Task Force.tungod kay ang siyudad nagpabiling epicenter sa kumpirmadong kaso sa COVID-19 sa rehiyon.
Kini base na sa nakab-ot sa gihimong virtual meeting kagahapon sa mga membro sa Caraga One Shield pagpanguna ni chairman ug Agusan del Norte Governor Dale Corvera.
Padayon usab ang otoridad sa pag-monitor sa kalambuan ilabina kay sa kasamtangan nagkataas ang suspected cases sa siyudad.
Ilalom sa GCQ, ang regional border lockdown magpabiling ipatuman.
Nasayran nga sa DOH Caraga situational report no. 76 on COVID-19, nga dunay petsang Abril 29, 2020, ang rehiyon dunay tulo ka confirmed COVID-19 cases nga pulos sa Butuan City diin usa niini ang nakarekober na ug na-discharged, usa ang padayong na-admit ug usa ang strict quarantine.
Samtang misaka pa sa 39 ang suspect cases diin pinakadaghan sa Butuan City nga muabot sa 22, sa Agusan del norte dunay 6, Cabadbaran City-2, Bayugan City-2, Agusan del Sur-2, Surigao del Norte-1, Tandag City-2, Surigao del Sur-1,ug Bislig City-1.
