BUTUAN CITY – Nakatala na usab og 33 ka bag-ong kaso sa COVID-19 ang Caraga Region kondiin 19 niini mga babaye samtang 14 ang mga lalaki samtang 52-porsiento ang anaa sa edad nga 21 hangtud sa 50-anyos.
Upat niini natala sa Agusan del Norte kondiin tulo ang gikan sa lungsod sa Santiago samtang usa sa Nasipit; 2 sa Cabadbaran City nga natala sa Brgy. Poblacion 9 ug Comagascas samtang siyam ka mga kaso usab ang natala sa Agusan del Sur kondiin 3 ang gikan sa Veruela, tagduha sa Bunawan ug Trento ug tag-usa usab sa Esperanza ug San Francisco.
Usa ka kaso usab ang natala sa Brgy. Washington sa Surigao City ug sa lungsod sa Tago, Surigao del Sur samtang 16 usab ang natala sa Butuan City kondiin 4 niini sa Brgy. Ambago samtang 2 sa Libertad, samtang tag-usa sa Brgy. Baan Riverside, Bancasi, Cabcabon, Dagohoy, Leon Kilat, Limaha, Mahay, Pianing, Sumilijon ug Taguibo .
Mi-abot sa 25 ang wala’y simtomas samtang walo ang duna’y mild symptoms ug ang tanang 33 naka-quarantine na, gi-monitor ug gi-atiman na sa nagkada-iyang quarantine facilities.
Sa pagkakaron, mi-abot na sa 2,724 ang cumulative COVID-19 positives ning rehiyon kondiin 661 niini ang mga aktibong kaso, samtang 1,947 ang nakarekober ug 116 ang kinatibuk-ang patay.
