BUTUAN CITY – Nagpabiling hapsay sa kinatibuk-an ang mga dula sa Caraga Athletic Association Regional Sports Competition 2023 bisan pa man sa taho nga pipila sa mga estudyante ang nakuyapan tungod sa sobra ka-init sa panahon ug sa gika-ingong pagka-possess sa laing pito.
Sa eksklusibong pakighinabi sa Bombo Radyo Butuan, gibutyag ni Peter Tecson, tigpamaba sa Department of Education kon DepEd-Caraga nga mu-abot sa 205 ka mga atleta ang gi-asister sa medical team diin 72 sa maong ihap ang gihatagan og first aid treatment dayong pasalamat tungod kay wala may atleta nga kinahanglang dalhon sa ospital.
Samtang sa taho kalabot sa mga atleta gikan sa delegasyon sa Surigao City nga gitu-uhang nasudlan og dautang espiritu, giklaro ni Tecson nga gipa-ilalom na sila sa laboratory medical test ug nasutang wala’y nakitang deperensya sa ilang panglawas.
Gipadala usab nila ang ilang psychologist ug walay kini nakita nga duna sila’y psychological problems nga kinahanglang tambalan.
Tungod niini, gihulat na lang nila ang mahimong konklusyon sa mga anaa sa religious sector aron matumbok kung demonic possession ba gyod ang hinungdan niini.
Aminado si Tecson nga bisan og tinuod ang ingon niini nga panghitabo apan dili pa nila kini makumpirma hangtud nga ang official exorcist na sa simbahan ang mukumpirma niini.
Sa karun, gibalhin na og billeting quarter ang mga atleta samtang gipa-abot ang disisyon gikan sa Surigao City Division kung papaulion na lamang ba ang mga bata sa ilang panimalay o kaha tugutang makabalik sa ilang mga dula.
