BUTUAN CITY – Padayon pa ang gihimong imbestigasyon sa kapulisan sa Rosario, Agusan del Sur aron matumbok ang mga responsable ingon man ang motibo sa pagpusil-patay sa kapitan sa Brgy. Cabantao pasado alas-8:50 kagabii.
Sigon ni P/Sr. Insp. Gerald Malubay – hepe sa kapulisan sa maong lungsod, naka-angkon og lima ka mga samad-pinusilan sa iyang lawas si Kapitan Tim Carampatana Saday, 39-anyos, minyo og residente sa Purok 1 sa maong barangay kinsa mao usab ang vice chairman sa Hugpong Federal Movement for Luzon.
Damay usab sa pagpamusil ang iyang ka-uban sulod sa itom nga Crosswind nga si Kenken Tuyor, 30-anyos, residente sa Purok 2 kinsa anaa karon sa intensive care unit kon ICU sa ospital sa lungsod sa San Francisco sa susamang lalawigan.
Nasayrang gikan pa dinhi sa dakbayan sa Butuan ang biktima ka-uban sa gilusad nga federalism road show campaign og pa-uli na unta apan pagtungod niini sa ilang pinuy-anan, dinhi na gitiro sa riding in tandem ang ilang gisakyan. (Beth Ruiz)
