BUTUAN CITY- Hangyuon ni Ombudsman Jesus Crispin Remulla ang Sandiganbayan nga i-discharge ang kanhi Secretary sa Department of Public Works and Highways kon DPWH nga si Manuel Bonoan isip akusado aron himuong state witness sa kasong plunder ug graft nga naglambigit sa giingong P573 milyon nga kickback sa mga proyekto sa flood control.
Sumala ni Remulla, kritikal ang testimonya ni Bonoan aron mapalig-on ang mga kasong gisang-at batok sa ubang mga akusado, lakip si Senador Jinggoy Estrada ug ubang opisyal sa DPWH. Samtang, nagpadayon pa ang preliminary investigation batok kang Senador Joel Villanueva ug Senador Francis Escudero ug gipasiugda sa Ombudsman nga walay espesyal nga kasabutan nga gihimo sa bisan kinsa gawas sa legal nga proseso sa korte.
Ang mga kaso naggikan sa giingong organisadong pamaagi sa ilegal nga budget insertions ug paghatag og proyekto bugti sa mga komisyon o kickback sa mga flood control project sa 2025. Si Bonoan usab gitugotan sa Sandiganbayan nga magpabiling ubos sa hospital arrest sa PNP General Hospital sa Camp Crame tungod sa iyang seryosong mga kondisyon sa panglawas samtang naghulat sa pagdungog sa iyang kaso.
