BUTUAN CITY – Abri na sugod karung adlawa ang Robinson’s terminal sa may JC Aquino Avenue ning siyudad sa Butuan aron modawat sa mga pasahero gikan sa Cagayan De Oro City ug Davao City ug kadtong mupadulong sa maong mga siyudad.
Sa kasamtangan, ang byahe sa mga bus units sa Bachelor Express Inc. ug Davao Metro Shuttle, gitakda lang matag-Martes, Huwebes ug Sabado kaduha lang sa usa ka adlaw.
Duna’y himuong orientation pag-abot sa mga pasahero alayon na sa ilang pag-home quarantine ilawom sa monitoring sa mga hingtungdang Barangay Health Emergency Response Team kon BHERTs.
Padayon gihapon ang pagpatuman sa mga health protocols atol sa pag-abot sa mga pasahero gamit ang thermal scanner, ingon man ang pagtan-aw sa ilang medical certificate, travel authority, RDT o kaha PCR result.
Sigon ni Sarapuddin Clao, operations manager sa Davao Metro Shuttle sa eksklusibong pakighinabi sa Bombo Radyo Butuan, tag-duha lang ka biyahe sa kada-adlaw nga eskedyol ang ilang himuon kondiin tag-usa lang sila ka biyahe sa taga-Bachelor padulong sa Davao City ug Cagayan de Oro City.
Terminal-to-terminal usab ang ilang pick-up og pagpanaog sa mga pasahero apan pwede gihapong maka-pick up og pasahero diha sa dalan basta duna lamang sila’y mga papeles nga ikapakitang luwas sila gikan sa COVID-19 sama sa rapid test negative result, travel authority ug medical certificate.
