BUTUAN CITY – Ubay-ubay nga mga drivers sa mga sakyanang apil sa ‘Libreng Sakay’ program ang midangop sa Land Transportation, Franchising and Regulatory Board kon LTFRB-Caraga tungod sa kagamay ra sa bahin nga kwartang ihatag unta kanila sa ilang mga operator.
Partikular nga nangreklamo ang mga drivers sa Diamond Transport Service Cooerative kon DATSCO human nakita gikan sa papirmahan unta kanila nga liquidation form nga layo ra kaayo sa kantidad nga angayan unta nilang madawat ang nakasulat sa lahi nga porma.
Sa eksklusibong pakighinabi sa Bombo Radyo Butuan, gipadayag ni LTFRB-Caraga regional director Ma. Kristina Cassion nga base sa gipirmahang kontrata sa mga operators ug drivers nga apil sa maong programa, 70-porsiento sa ilang ibayad mapadulong ngadto sa operator samtang 30-porsiento ang mapadulong sa driver ug dili na kinahanglan pang kuhaan sa operator.
Gidugang pa ni Cassion nga taud-taud na nilang nahulog sa account sa DATSCO ang kapin sa 2-milyunes pesos nga pundo alang sa duha ka semana nilang biyahe kondiin 30-porsiento niini ang pangswedo unta sa ilang mga drivers.
Apan base sa liquidation form nga gihatag ngadto sa mga drivers, grabe kagamay ra sa bahin nga mahatag ngadto sa mga drivers sa DATSCO kansa gilatid sa lahi na nga liquidation form nga gigamit rason nga ila kining gibalik sa DATSCO
Sigon ni Cassion, natural lang nga mas dako ang bahin sa operator tungod kay wala’y madrayban ang driver kung wala’y yunit gawas pa, apil na usab sa 70-porsento ang operating expenses.
Giklaro ni Cassion nga kung dili matud pa mabalik ang liquidation report, posibleng dili na unya makasalmot ang maong kooperatiba sa contract-servicing program nga sugdan na usab sunod buwan.
