BUTUAN CITY – Tulo ka mga gates ang gi-ablihan sa Butuan Central Elementary School aron paspas nga ma-accommodate ang mga magtutungha gikan sa alas-singko hangtud na sa alas-7:30 sa buntag.
Kini subay na sa pagpahugot sa security measures sa maong tunghaan human nagpagawas og kamanduan ang Department of Education Central Office aron magpatuman og mas hugot nga security measures sa ingon dili na ma-usab pa sa bisan asang tunghaan sa tibuok nasud ang nahitabong pagpamusil sa San Jose National High School sa Tacloban City.
Sa eksklusibong pakighinabi sa Bombo Radyo Butuan, gipadayag ni school principal Dr. Jocelyn Carampatana, nga gisugdan na nila kaganinang pasado alas-singko sa sayong buntag ang pag-inspeksyon sa bag sa mga estudyante ug sa ilang ka-uban nga chaperon o ginikanan gamit ang metal detector.
Tungod sa kadaghan sa mga magtutungha nga anaa entrance gate, gigamit nila ang ilang ikaduha ug ikatulong gate samtang anaa pa sa period of adjustment sa pagpatuman niini.
Gituyo ang sayo nga inspeksyon tungod kay ang klase matud pa sa mga grade 1 pupils, magsugod man sa alas-sais sa buntag.
Atol matud pa sa inspeksyon, ablihan gayod sa mga manulod sa eskwelahan ang ilang bag kondiin kaganina, duna’y nadiskitahan nga gunting ug bolo nga gisugyot niyang ikostudiya na lang sa classroom aron dili na magdala-dala ang mga bata ug mapagawas lang kung kini gamiton na.
Giklaro pa ni Dr Carampatana nga adiser kini nila gipatuman, ila na kining gi-anunsyo atol sa orientation niadtong panahon sa Brigada Eskwela rason nga timely kaayo ang pagpatuman niini.
Mihangyo usab siya sa mga ginikanan nga sa ilang balay pa lang, iplastar nang daan ang dalhunon sa ilang mga anak aron dili malangay diha na sa inspeksyon.
Gawas sa pagsugod na sa ilang inspeksyon, dugangan usab nila ang gi-instalar na nga mga CCTV ilabina sa mga lugar nga wala pa niini samtang ang anaa sa gate 3 nila nga CCTV, ila usab nga i-upgrade.
