BUTUAN CITY – Gipresentar na kaganinang buntag ni Police Regional Office kon PRO-Caraga regional director BGen Jose Caramat Jr. ngadto sa media ang ilang nadakpang si Rosanilla Consad alyas Lai, 54-anyos, residente sa Diamond St., B6, L22, Rosewood Plains Subd., Phase 2, sakop sa Brgy. Villa Kananga ning siyudad ug assistant principal sa San Vicente National High School ning siyudad.
Madumdumang bitbit ang arrest warrant nga gi-isyu sa 10th Judicial Region, Municipal Circuit Trial Court, Tubay-Santiago, Agusan del Norte sa kasong attempted homicide nga duna’y pyansang 36-mil pesos, nasikop kagahapon sa alas-4:30 sa hapon si Consad, ang regional Secretary General sa Alliance of Concerned Teacher kon ACT-Caraga kinsa wanted sa kasong attempted homicide human gilambigit sa pag-atake ug pagpusil kang PFC Junrel Cornelio ug CAFGU Active Auxiliary Emiliano Sajol, Jr., nga mga membro sa 29th Infantry Battalion, Philippine Army atol sa combat patrol operation sa Sitio Manhupaw, Brgy. Poblacion 2, lungsod sa Santiago, Agusan del Norte niadtong November 21, 2020.
Sa pagpresentar sa suspek, gipadayag ni General Caramat nga gusto lang nilang ipakita nga anaa sa maayong panglawas si Consad human gipa-ilalom sa medical examination ug ihatag kaniya ang iyang katungod ubos sa konstitusyon sa nasud.
