BUTUAN CITY – Gi-imbestigahan na si Department of Environment and Natural Resources kon DENR-Caraga Assistant Regional Director for Management Services Aimee Lampad-Dela Peña tungod sa alegasyong pag-abuso sa gahom ingon man pagpangurakot.
Kini human nagpahigayon og prayer rally ang mga membro sa DENR-Caraga Employees Union (DECAEMU) aron ipanawagang batukan ang dautang binuhatan matod pa sa maong opisyal.
Sa ekslusibong pakighinabi sa Bombo Radyo Butuan, gibutyag ni Atty. Redemptor Oha, tigpamaba sa DECAEMU, ubay-ubay’ng mga butang ang gustong ipatuman ni Dela Peña nga wala nahasubay sa proseso sama sa promosyon sa usa ka empleyado sa ilang buhatan nga dili qualified.
Gika-ingong gibalewala lang ni de la Peña ang mga qualified taliwa nga mi-agi na sa election process sa board ug counter signature na lang ang kulang apan wala niya pirmahi gumikan kay mas gusto niining i-promote nga paryente bisan og dili kini qualified gawas nga kulang pa kini sa mga credentials ug wala usab mu-agi sa saktong proseso.
Tungod sa wala pagpirma ni Dela Pena sa appointment, nabalda ang ilang trabaho alang unta sa ilang Mission and Vision ilabina nga nagkulang ang ihap sa mga empleyado sa DENR-Caraga.
Nanawagan ang maong grupo nga kung dili pirmahan ni de la Peña ang sertipikasyon sa appointment mas maayong mukanaog na lang matod pa kini sa iyang pwesto.
Nasayrang sa prayer rally sa maong grupo atol sa ilang general assembly kagahapon sa hapon sa DENR Caraga Regional Office sa Brgy. Ambago, ning syudad, nagsuot sila og kolor pula nga t-shirt nga dunay nakaprinta sa ilang pagkadismaya ug panawagang mu-resign na ang ang maong opisyal.
